فلسطيني ... تجميع الصين الشعبية

خطر على بالي مره .. وبما أنه الصين الشعبية عندها القدرة الكاملة على تجميع أي شي بالدنيا ، وبضاعتها تقريباً على مستوى جيد ، وأسعارها رخيصة كتير ، وخططها الإستراتيجية على مستوى عالي .. إني أراسل أكم مصنع هناك على أمل أنه يجمعولهم شي كم كاتب فلسطيني متلي .. بشتري منهم واحد ولا أثنين يساعدوني على كثرة هالأحداث اللي قاعده تصير ببلادنا هاليومين .. وبالمره ببرمج واحدهم على الكتابة بالشكل اللي بيحبه ( س ) من الناس والتاني ببرمجه على محبة ( ص ) من الناس وهيك بكون ضربت ثلاث عصافير بحجر واحد .. الاول اني بقيت طفران وملاحق بس مبسوط .. والثاني بكون كسبت ( س ) و ( ص ) وشوية إمدادات مادية تنعنشني شوي وتخليني اتجرأ وأطلب كيلو لحمة للولاد بدل العظم اللي كسر اسنانهم ...
المهم ...
إجاني الرد على رسالتي اللي كنت قربت أنساها بعد حوالي شي شهر ونص .. وبالتحديد من مصنع للساعات المنبه – اللي بتنباع على البسطات ببلاش إلا ربع – ولأنهم عارفيين أني ضليع جدا باللغة الصينيه وبشي أربع أو خمس لغات تانية .. أختصروا على حالهم وبعتوها بالعربي ...... ماعلينا .. مكتوب بالرساله التالي:
السيد الكاتب المحترم تحيه:
نأسف لإبلاغكم بأنه وبعد عدة إجتماعات متتالية على مدى شهر ، أقرت وحدة التطوير والتسويق والإنتاج بمهندسيها ومفكريها وإداراتها الى عدم جدوى تقليدك أو تقليد منتج مشابهه لك....! طبعاً وهون انتهت الرساله.
بس ... هذي هي ؟؟؟ شو هالحكي يعني ؟؟؟ وانا محتار وعم بحكي مع حالي دخلت علي المره بغلاية القهوه وشافتني بهالحاله :
- شو مالك يا زلمه ؟؟
- ولا شي بس إجاني خبر ما عجبني
- خبر ؟؟ خير ان شاء الله ؟
- خدي شوفي هالرسالة اللي اجتني !
- إممممممم.................. هسه هذا اللي مزعلك ؟؟؟ يازلمه والله معاهم حق .. مين بده يشتريك ؟؟؟ من وين بدك تلاقي وحده غيري ترضى فيك .. لا وبدك يدفعوا مصاري فيك كمان ... بعدين هيه العالم ناقصها دوشه ... يا خي احمد الله اللي ما إجوا طخوك ...
وراحت !!!!!!!!
بتعرفوا والله المدام معاها حق 100% الساعة المنبه أحسن مني وبتفيد أكتر .. يعني هذيك بترن وبتعمل دوشه كبيرة بس بتصحيك من النوم عشان تروح على شغلك.. فبيستفيد من قومتك على الشغل .. مديرك اللي بيحرث عليك زي الدابه أجلكم الله .. وبيستفادوا ولادك من عدم شوفتك هالكم ساعه اللي بتغيب فيهم ... وأكيد بالدرجه الاولى مرتك اللي مش طايقة صوتك وطلباتك ..
بس أنا .....! دوشه عالفاضي .. برن وبوجع الراس بدون ما يستفاد حدا .. والحمد لله بضاعة كاسده متل ما قالت أم العيال ، يعني مين بده يجيب كاتب يصدع له راسه ؟؟ مهو اللي بده أحكيه كل العالم قرفانه منه قد ما سمعته ومرء على راسها ....
والأحلى من هيك ... وبعد تفكير عميق طلع أني عالبسطة... باخد حيز كبير .. وعالفاضي بما اني بضاعه كاسده ...لا بنباع ولا بنشرا ...
بتعرفوا ... لو إني صاحب بسطه بالشارع بجيب شي عشرين ساعة منبه وبشغلهم عشان أدوش العالم وأخليهم يشتروهم .... أحسن .. وأربح !!!!!!!!!!!!!!
ولا إنتوا شو رأيكم ؟؟؟