من طرف صالح صلاح شبانة الخميس فبراير 25, 2010 11:29 amالفروسية والجحوشية
من نكشات العبقري زيد أبو قراد
بقلم: صالح صلاح شبانة
من نكشات العبقري زيد أبو قراد
بقلم: صالح صلاح شبانة
يا جماعة الخير ، السلام عليكم ورحمة الله وبركاته ،
هذا يا جماعة الخير الشطاره والفهلوة إشي جميل جداً ،وأنت لما تشوف ولد شاطر بتتمنى انه هالولد يبقى إبنك ،أو يبقى إبنك مثله ، ولمّا تسمع عن واحد مثل صحن الصيني ، من وين ما طرقته رن ، قلبك بنشرح له ، وبتتمنى لو الله سبحانه وتعالى يرزقك واحد مثله ، واذا أحلامك وصلت لحد الشيخوخه ، وما بتقدر تتمنى ها لأمنيه لنفسك بتتمناها لأبنك ، ما اسمه الا امتداد الك ورح يحمل بعد اسم أبوه اسمك...!!!
بس في هناك خطأ ملعون والدين وشاهدين وحُرسي منهم وغاد ، إنهم بعض الناس بعتبروا النصب والدجل واغتصاب حقوق الناس ، والاعتداء على حريات الناس نوع من أنواع القوه والفهلوه وفي ناس بعتبروا الأذى شطاره ، يعني الواحد بقدر يعمل حاله أبو رابوص وبربص على قلوب الناس ويحصي عليهم أنفاسهم....!!!
وناس باختصار شديد بعتبروا الشر قوه ومكسب ، وهذا الخطأ الشنيع ، لأنها الفروسيه،والقوه
والفهلوه ، وإلها أخلاقها ، والها سلوكياتها ، وانت قديش بتبقى عندك فروسيه ، إنت بتبقى بطل، وللفروسيه معايير ، وأهمها الشهامه والنخوه والكرم ، ورفع الضيم والظلم ، والترفع عن الصغائر ، وزمان بقى الفارس بترفع عن منازلة ممن هب ودب ، وما بقى ينازل واحد غير لمّا ينتسب للقوم ، ويبين مين هو من الناس ، وصياد الأسود ما بقى يمَرِّغ سيفه بدم كلب ، والفارس ما بقى يمرغ سيفه الا بدم فارس مثله ، اللي هو أهل لهذاك النزال ....!!!
بس الحرامي والسافل والقرصان ، ببقى يولغ بدم الناس عن جنب وطرف مثل الكلب المسعور ، وشوفو الفرق بين الاثنين ...!!!
اليوم الفروسيه انتهت وصارت مجرد رياضه للناس الهاي هاي ، لأنه اللي مثل أفضالنا سلامة قدرنا ما عنده امكانيه يشتري واحدنا جحش أجرب ، مدبّر ، فكيف عاد بفرس وعدّة الفارس ..؟؟!!
خلوها على الله يا جماعة الخير !! وصارت الخيل للهو والربح الفاحش والخساره الفاحشه للملايين اللي الله بلاهم بهذاك المرض ، مرض المقامره و خسارة الأموال...!!!
وصارو الناس يتبارزوا بأشياء ثانيه ، بالرياضه مثلا ، وكرة القدم بالتحديد ، وهي أصلها انجليزي ، وفيها كل أمراض الأنجليز الخبيثه وهي إثارة النعرات الطائفيه والعنصريه ، وتحويل جمهور الكره لجمهور منتن معفن ، قلما تنتهي مباراه من غير دم وتخريب واصابات ، وتحويل الأمن من حامي أمن البلد ، إلى فصل بين جماعات بتنكش في دبراتها اللي تحت الحلس ، وأحقادها اللي لقيت الملعب المكان الأفضل لتفريغها ، ومرات ربنا الله ببقوا اللاعبين فرسان ، بس الجمهور اللي هدفه التخريب ، بقلبها هم وغم ونكد وعنصريه وبشاعه ، ومرات بصير ضرب القناوي والدبسات لأبو موزه ، وبروح تحت أقدام طوفانهم جرحى وقتلى ، لا الهم ناقه ولا بعير ، وصارت ها للعبه الممتعه تفريغ لأحقاد مبيته ، وتصفية حسابات وأحقاد شخصيه ، الرياضه بريئه منها براءة الذيب من دم يوسف الصدّيق ...!!!
وهون يا جماعة الخير طق طقتك العافيه ، ولاّ الفروسيه صارت جحوشيه ، لا بل الجحوش عندها فطره أسلم لأنها ما بتسبب الأذى اللي بسببوه البشر لأنفسهم ....!!!
صار مثلا رياضه اسمها الرالي ، او سباق السيارات ، بنزلوا المتسابقين لأماكن خاليه من الناس ، أو المناطق الصحراويه ، اللي ما بلحقوا في الناس الضرر ، وبتسابقوا وبستمتعوا بوقتهم وبسعدوا الناس اللي بحبوا هذي الرياضه ، واذا في خطر فالخطر عليهم وعلى سياراتهم ...!!
بس لما شوفرية عمومي اثنين محمل كل واحد فيهم (30) راكب ويتسابقوا مشان مين اللي يقنص الراكب قبل الثاني ، بدون أي اعتبار للراكب ولا للماشي ، هذي أمانة الله عليكم اسمها فروسيه ولاَّ جحوشيه ..؟؟؟
واللي عنده سياره فدعوسه ، فطسه ومهيونه كل اشي فيها بزمر الا زامورها ، ومسلمها لأبنه المراهق يتزعرن فيها ويؤذي عباد الله ، واذا ساوى حادث ما بخلي صرمايه الا وباسها تيطلع من ها لحيونه اللي حط حاله فيها ، فبدينكم وايمانكم ، هذي فروسيه ولاَّ جحوشيه...؟؟؟!!!
فيا جماعة الخير ، يعني إحنا بين الشاكوش والسنديان ، مطروقين ، مضروبين ، حال الويل والبين حالنا ...!!!
احنا بنحب وبنحترم الفرسان والفروسيه ، والفروسيه شرف ، والفارس من أعلى الأوسمه والألقاب عند الأنجليز ، والفرس عند العرب عز وبطنها كنز وبصمات حوافرها وسنابكها لا زالت حاضره على كل تاريخنا وفتوحاتنا وانتصاراتنا ...!!!
واللي بده يصير فارس هذاااااااااك هو الميدان ..يا حميدان ، وما يخلي في ظل ها لنظام الأعوج اللي الحق مبنج ومخدر ، والباطل بسرح وبمرح ، وما يخلوا أجساد وأرواح وكرامات الناس مكسر عصا لأوهامهم ...،
وخاطركم مع السلامه
» خسارة عليك يا منتدى النسر الاحمر
» أقوال جورج حبش
» اليسار التونسي الآن وهنا
» أغنية يا أسرانا يا بواسل (جديد الشعبية)
» أغنية يا أسرانا يا بواسل (جديد الشعبية)
» فش غلّك واحكي .^ اكثر ظاهرة او عادة بتتمنى زوالها من مجتمعنا ^.
» اربع كلمات تكشف عن حالتك
» حصريا اغنية غسان كنفانى اسمو على الريشة
» احدث اغنية للجبهة:هيلا هيلا ديمقراطية جبهة قوية 200% تربي رجال
» مرحبا
» أغاني رائعة للفرقة اليسارية...فرقة الطريق العراقية
» جميع البومات فرقة صابرين
» ويستمرّ النضال في تـــونس..
» حصريا اغنية وصية الشهيد من شريط الهدف 11
» اغنية الزحف الجبهاوي للانطلاقة 42
» حصري على ملتقى النسر الاحمر اغنية القدس تشرررع
» ******* ابو الفقر .. حداية نار موسى حافظ والجلماوي وكمان شاعر ثالث
» اشحن رصيدك مجانا
» ماتفوت لهون