من طرف صالح صلاح شبانة الأربعاء فبراير 24, 2010 6:54 pmوصايا ستي -13
المخفي والظاهر
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com
المخفي والظاهر
وصايا مفعمة بالحكمة الشعبية بقلب ونبض ستي
بقلم الداعي بالخير : صالح صلاح شبانة
Shabanah2007@yahoo.com
يا ستي الله يرضى عليك..هيذ بدت ستي وصيتها عن المخفي والظاهر ... وبقت تسرح في عينيها لبعيد وكأنها بتنحض الصور من أعماق ذاكرتها المليانه من أسرار الكون ، ومن تجربتها اللي دايما بتظل بتنبض بالحياه والعطاء ...!!!
يا ستي ، ها لدنيا فيها المخفي والظاهر ، فيها مخفي عيب يظهر ، واللي بحاول يظهره جزاته على الله ...!!
وفيها الظاهر اللي عيب على اللي بخفيه ، لأنه لازم يبقى ظاهر ...!!
يعني الجيزه ما بصير تختفي ، على العكس الأصل إشهارها ، لازم تظهر والكل يدري فيها ، وما بتم الشرف إلا بإظهارها ، وإخفاءها بترتب عليه مساوئ اجتماعيه وأخلاقيه مش محموده ، وأشياء مسيئه لو تمت بالخفا والعتمه ...!!!
والمعروف اللي بعمله معك أهل الخير هذا المعروف لازم تظهره وتبينه ... واجبك تعلنه بقدر ما واجبك بتخفي معروفك اللي انت عملته مع الناس مشان ما يصير مَنّْ وأذى وتحميل الناس جميل وطناطير هوا ...!!!
وقالوا في المثل يا ستي : (ثلاثه ما بتخبوا ، الحب والحبل والركوب عَ الجمل)...!!!
والحب اللي هو الجيزه والعرس ، ومش علاقات الدس المشبوهه اللي بتصير في العتمه والظلام ،وقالوا يا ستي عن الأشياء اللي بدك تخفيها وما بتختفي إلا لفتره قليله (بزقه تحت الحصيره ما بتختفي) ، بجوز تعملها المغرب ، الصبح بدهم يلفوا الحصيره ويقيموها ، هذا هي بينت ، والأشي اللي بتحاول تخفيه بالعاده هو الأشي المعيب ، اللي من العيب والعار نساويه ،
إنت لا سمح الله راودتك نفسك الدَنيه تعمل رديه ، وكل إنسان عنده لحظة ضعف بسيطر عليه الشيطان الرجيم وبوسوس له ، لو لا سمح الله صارت معك لا تروح تحط بوق في ثمك وطبل في رقبتك ، وتروح فاضح حالك وامّجَرِّسْ على نفسك ( إذا ربك ستر عليك ، استر على نفسك)
لأنها يا ستي (صدور الرجال صناديق مسكره ومفاتيحها الألسن) والمطلوب منك يا ستي (ضب ثمك على مفتاحك بظل سرك في صدرك لمّا تنزل قبرك)...!!!
وعندك مثلا العله في النفس ما بتختفي ، يعني سلامتك حسيت بوجع ، ما بدك تخفي ها لوجع ولازم تظهره وتتطبب منه قبل ما يقتلك ، والمثل بقول : (اللي بخفي علته بتقتله) ، بدك علاقتك مع رب العالمين تخفيها وتخليها قائمه بينك وبينه سبحانه وتعالى مشان ما تصير رياء ونفاق والناس يقولوا : فلان صلى ، فلان صام ، فلان زكّى ، وانت يبقى هدفك إنهم الناس يعرفوا ، بس هذي الأمور إذا بقت سر بينك وبين ربك سبحانه وتعالى ، ببقى أجرك فيه عظيم ، على شان هيذ يا ستي..هذي الأمور لازم تختفي ، والمثل بقول (الظاهر إلنا والخافي على الله)..!!
إحنا بنوخذ بالظاهر ، أنا مش مطلوب مني أشق صدر فلان واشوف اللي جوّاه ، لأن صدر فلان صندوق سره ، ما بعلمه غير رب العالمين ، أنا بوخذ ظاهر فلان لأني اللي بس في الظاهر ..!!
وتصور يا ستي إنه كل واحد لو طِلِع على صدور وقلوب الناس الثانيين وشو فيها من جوّه ...كن صار خراب لِبيوت العامره ...!!!
وفي أشياء ما بتنعمل في النهار ، لازم تساويها في الليل ، وبقول المثل (على بال مين ياللي بترقص -ولاّ- بتغمز في العتمه) ، وبقول المثل:(كل محجوب مرغوب ، وكل معروض مهان) ،وبقول المثل :(وجه لا يُرى بالذهب ينشرى) و(اللي بده يناطح ما بخبي قرونه) و(كل مجهول طاهر ، ولا غيبه لمجهول) وبقول المثل (أثر الدَّبِر تحت الوبر) و(تحت السواهي دواهي)…!!
وأمثال كثيره مع وضد ، مع المخفي والظاهر …. وسلامة فهمك يا ستي..،
تقرأ بلهجة أهل سنجل
» خسارة عليك يا منتدى النسر الاحمر
» أقوال جورج حبش
» اليسار التونسي الآن وهنا
» أغنية يا أسرانا يا بواسل (جديد الشعبية)
» أغنية يا أسرانا يا بواسل (جديد الشعبية)
» فش غلّك واحكي .^ اكثر ظاهرة او عادة بتتمنى زوالها من مجتمعنا ^.
» اربع كلمات تكشف عن حالتك
» حصريا اغنية غسان كنفانى اسمو على الريشة
» احدث اغنية للجبهة:هيلا هيلا ديمقراطية جبهة قوية 200% تربي رجال
» مرحبا
» أغاني رائعة للفرقة اليسارية...فرقة الطريق العراقية
» جميع البومات فرقة صابرين
» ويستمرّ النضال في تـــونس..
» حصريا اغنية وصية الشهيد من شريط الهدف 11
» اغنية الزحف الجبهاوي للانطلاقة 42
» حصري على ملتقى النسر الاحمر اغنية القدس تشرررع
» ******* ابو الفقر .. حداية نار موسى حافظ والجلماوي وكمان شاعر ثالث
» اشحن رصيدك مجانا
» ماتفوت لهون