لمطشش و مهر سلام

بقلم :الداعي بالخير صالح صلاح شبانة
بِوَّشّوشْ الطرشا ، وبغامز العمشا ، وبوكل فجل وبتدَّشا
لمّا ما يلاقي معلاق وفشه ، داء بتفشى ، والساتر الله الرحمن
الله يجير الناس ، من الوسواس الخنّاس ، اللي عَ القلب دبشه ،
وما معه يتعشى ، وبشتري بحق الرغيف حلق للأذان
يل للي متضايق ومزنوق ، إنزلك نزله عَ السوق ، ولمّا أعصابك تروق ،
اتفرّج عَ القاعد وبتمشّى ، دنيا مليانه أحزان
الدنيا بدها نخشه ، اتكت قش المقشه ، عن راس الجوز المبخوش ،
اللي باع لحافه والفرشه ، تَ الست حرمته تطالع النسوان
تشتري مسكاره وصبغه ، وصندل بدال البلغه ، وباعت الخروف اللي ثغّا ،
واشترت بحقه كلب يرافقها لزيارة الجيران
لِمّسَخم جوزها طشش ، صار يمشي ويتحركش ، مرّه بالذبان ومرّه بالبرغش ،
ظلم المَرَه اللي فَشَشْ ، ورَبّى عِلّه عَ القلب التعبان
صار يوشوش الطرشا ، ويغامز العمشا ، ولمّا يجوع وما يلاقي فَشَّه ،
يوكل فجل ويتدَّشا ، راح خساره قرشه ، ماشي مطوطح مثل السكران
-------------
مهر سلام
صالح صلاح شبانة
مَرَّه ، من زمان ...زمان
زي ما تقولوا ، من الزمن الغابر ،
السحيق ، لبعيد بعيد ، أكثر من الصدق في هالزمان .
التقن ثلاث صبايا حلوات ،
وحده اسمها كرامه ، هذي جبهتها عاليه فوق ،
وإلها في النفس شان .
ووحده إسمها حريه
ثوبها احمر ، ووجهها أحمر ،
ووين في ارض مثل ارض فلسطين ،دره في تاج الاوطان .
بتلاقوها موجوده ، عاليه فوق ،
ما بتنوصل ، وما بتنطال ،
وما بتطاوع حدا إلا بالعزم والإيمان .
وبقت وحده إسمها سلام ،
ناعمه مثل النسيم ، حالمه مثل الطيف ،
ع كتاف حريه وكرامه ، محموله مثل سلطان .
وها لصبايا الثلاث الحلوات ،
موتهن ولا ساره ، اللي بتزرع الموت ،
فيعيون طفل ، بس ها لطفل ما هان .
حمل مقليعه وحجر ، شوفوا !!! حجر !!
مهر للصبيه سلام !!
إنحمل ع صدور كرامه وحريه نيشان !!
Shabanah2007@yayoo.com