ملتقى النسر الأحمر

أهلا وسهلا بكم فى ملتقى النسر الأحمر
رفيقى الزائر انت غير مسجل نتمنى منك التسجيل
للأستفادة من كل مميزات الملتقى

فكرى تعبوي تنظيمي


    قصتي قــصة (قصة واقعية )

    شاطر
    avatar
    عمرو

    جندي جديد  جندي جديد


    ذكر
    عدد الرسائل : 87
    العمر : 25
    العمل/الترفيه : بشتغل
    المزاج : عاشق بلا حزن
    الدولة :
    نقاط : 2640
    تقييم الأعضاء : 0
    تاريخ التسجيل : 11/12/2010
    الأوسمة :
    وسام مسابقة الضيف المجهول :

    قصتي قــصة (قصة واقعية )

    مُساهمة من طرف عمرو في السبت ديسمبر 11, 2010 8:18 pm


    قصتي قــصة (قصة واقعية )

    قصة فتاة في 17 من عمرها التقيت بها في مدرستي الثانوية
    الفتاة أسمها ((البندري))00
    دعونا نبداء قصتي معها وكيف تعرفت إليها وما هي قصتها

    بــداية العام الدراسي
    أمي كعادتها ايقضتني مبكراَ دخلت غرفتي وقالت
    أمي: زين أنك جالسة حسبتك نايمه للحين0
    أنــا:صباح الخير يمه أكيد أجلس بدري أبي أشوف صديقاتي
    أمي: يالله أسرعي الباص يجي الحين لا تنسين تفطرين0
    أنــا:إن شاء الله0 زينت شعري ولبست جزماتي أعزكم الله ونزلت تحت أفطرت لبست عبايتي لين الباص يدق البوري
    طلعت سكرت الباب وراي وركبت وكعادته السواق مسرع حيل وصلني وراح دخلت المدرسة تذكرت كلمات أمي اللي ترددها كل يوم قبل أروح للمدرسة (لا تنسين تقرين على نفسك أقري المعوذات والفاتحة والكرسي)
    دخلت نزلت عباتي وعدلت شعري شلت عباتي و شنطتي ورحت أمشي بشويش دخلت مبنى المدرسة رحت أدور على فصلي لقيت وحدها أعرفها السنة الماضية سلمت عليها قالت لي
    سارة:آهلين إخبارك وش مسوية؟
    أنــا:الحمد لله تمام أخبارك أنتي؟
    سارة: تمام على فكرة فصلك أخر فصل هناك (أشرت لي على فصلي)
    أنــــا:مشكورة (رحت لفصلي دخلت لقيت البنات نصهم اعرفهم ونصهم لا اخترت لي مكان و حطيت شنطتي وعباتي طلعت العطر من شنطتي وتعطرت دخلت العطر
    بالشنطة التفت إلا لقيت صديقاتي دخلوا رحت مسرعة سلمت عليهم )
    طلعنا من الفصل ورحن نتمشى في الممرات ونضحك و نسولف وكل شوي واقفين نسلم على بنات نعرفهم 00
    صفر الجرس وكعادتها أستاذه هيا قالت
    أستاذه هيا: على جميع الطالبات التوجه للفصول0
    حنا طنشنا وما دخلن للفصول لأنهم فرقونا أنا وصديقاتي
    ما دخلنا الين جوا المعلمات المنوابات ودخلونا غصب
    جلسنا أنا وصديقتي (ش) نسولف مع بعض وجت عندنا صديقتنا (أ) وجلسنا نسولف حنا الثلاثة (ن) كانت غايبة أول يوم (أ) صحيح أنها مو صديقتي المقربة بس البنت مرررره حبوبه جتنا معلمه وجلست عندنا تتكلم عن العطلة و بداية العام الدراسي حنا طنشناها وما أهتمينا لكلامها لأننا حفظنا الكلام اللي يقولونه مثل أسامينا. (الحين بداء العام الدراسي وسنه جديدة.... الخ)
    مرت الحصص الأولى بسرعة لأننا انشغلنا بالسوالف
    رن جرس الفسحة وطلعنا أنا وصديقتي (ش) ورحنا لفصول صديقاتنا الأخريات وعدى اليوم على خير وحنا ضحك وسوالف واليوم الثاني كمان والثالث بعد و الأسبوع والشهر
    بعد فتره طويلة جت وحده ونادتني جيت لها أبي أعرف البنت شنو تبي مني البنت أسمها رشا قالت
    رشا:السلام وش أخبارك ؟
    أنــا:وعليكم السلام الحمد لله بخير0 (أنا كنت مستغربه من البنت ومعالم الاستغراب بانت على وجهي)
    رشا:أنتي ما تعرفيني لكن أنا صديقتي البندري معجبة فيكِ وقالت لي روح قولي لها لأنها مستحيه تقول لك0
    (أنا كنت مستغربة مو لأن البنت أول معجبة بس لأن صديقتها جابتها على بلاطة يعني على طول قالت الكلام
    صديقاتي نادوني التفت لهم وقالوا وش فيه قالت (هـ) يالله تعالي بسرعة رشا شافتهم نادوني قالت
    رشا بابتسامه : شكل صديقاتك يبونك 0
    ابتسمت وقلت: ما يستغنون عني أكيد عندهم شيء مهم0
    رشا:أوكيه راح أجيكِ بفسحة الصلاة0
    أنــا: أوكيه0
    رشا:مع السلامة0
    أنــا:مع السلامة0
    رحت مع صديقاتي وهي راحت مسكوني صديقاتي و سألتني وحده منهم قلت لهم السالفة من طقطق إلى السلام عليكم0

    فسحة الصــــلاة
    كنت أمشي مع صديقاتي قالوا بيروحون للكافتيريا علشان يشترون وأنا جلست أصارخ عليهم
    أنـــا:أنتن ما تشبعن بس تأكلن الناس تسوي ريجيم وانتن تأكلن0
    ضحكت(ش)وقالت:خليكِ على الرجيم يا أم الرجيم0
    قالت(هـ):أنا أكل ولا كني أكل ما أسمن ولاشيء المشكلة أنتن0
    أنا مليت من الوقفة في الكافتيريا وقلت
    أنـــا:يالله خلصن تعرفن أني ما أحب أطول هنا0
    الكل:زين يالله0
    ( راحن و اشترن وطلعنا وظلينا نتمشى و نسولف مرت رشا من عندي ونادتني صديقاتي طبعاَ ما يتركن حركات الإحراج رحت معها ووقفنا بمكان وظلت تتكلم عن صديقتاه و عطتني فصلها وأسمها)
    أنـــا:رشا أسمعي أنا ما أحب حركات الإعجاب هاذي
    أنا راح أعتبرها صديقة مو معجبة وهي كيفها0
    رشا: بس هي تحبك لدرجة كاتبة أسمك على طاولتها ودفاترها0
    أنــــا:رشا أنتن بعدكن صغيرات أنتي وصلي لها هالكلام وبس وقولي لها أعتبرها صديقة وأخت وبس0
    رشا:طيب أنا بوصل لها الكلام وأعطيكِ الرد نهاية الدوام أو بكرة 0
    أنـــا: أوكيه0 رحت مع صديقاتي وهي راحت مع صديقاتها
    طبعاَ البندري ما كانت معهن لأنها مستحية مني وجالسة من بعيد وتشوف0
    صفرت الفسحة ورحنا للفصول طبعاَ ما قدرنا نتأخر لأن المعلمات ينقصنا درجات أو يوقفنا0
    خلصت الحصة ظليت أنا و(ش) نشيل كتبان وأغراضنا بشويش و نسولف الين جت معلمة أنا ما أطيقها معلمة التدبير وقالت
    المعلمة:يالله اللي هنا بسرعة أطلعوا الباصات تنتظر تبي تمشي0
    قلت بيني وبين نفسي(صدق كذبة الحين تقولون بسرعة ونطلع ولا نلقى باصاتنا ونظل جالسات بالشمس الين الباصات تجي)شلت أغراضي وطلعت أنا وصديقتي0
    طلعت لقيت الباص ما جاء وصديقتي بعد باصها ما جاء وظلينا جالسات براء الين جاء باصي ورحت وهي المسكينة ظلت تنتظر باصها ما جاء0
    ركبت الباص وعلى طول وصلني لأن بيتنا قريب من المدرسة وراح0 دخلت البيت ودخلت دورة المياه أستحميت و تغديت وما نمت جلست أذاكر وأحل وأجباتي و ظليت بعد الساعة 4 العصر فاضيه جلست على الكمبيوتر أشتغل مر الوقت وأنا ما حسيت إلا أذان المغرب وصليت ورجعت أكمل الشغل وما حسيت الين إذن العشاء وصليت وبعدها طفيت الكمبيوتر ورحت أساعد أمي0

    9مســـــــاءاَ تعشيت ونمت
    صحيت الساعة 4ونص الفجر صليت ورحت أتجهز لأني أجلس فترة طويلة أنا ما خلصت من تسريحة شعري تعرفون حركات البنات لازم تكون ستايل قدام بنات المدرسة يعني تنافس وجذب البنات ومين أحس شكل ومظهر0
    فجأة سمعت صوت بيب بيب طلعت مسرعة أركض مع الدرج وبغيت أطيح على وجهي لبست جزماتي أعزكم الله وعباتي بس حطيتها ولا سكرتها طلعت وما أفطرت لقيته باص بنت جيراننا طاح قلبي رجعت داخل و أفطرت وعدلت عباتي وتجهزت بعد 5 دقايق أو أكثر جاء باصي ركبت ورحت للمدرسة دخلت نزلت عباتي وعدلت شعري ورحت لفصلي ,أنا أمشي في الممر مرت من جنبي رشا و معاها بنت طالعت فيها قالت رشا
    رشا:صباح الخير0
    أنــا وبابتسامه عادية:صباح النور0 كلمت طريقي سمعت وحده قالت
    ؟؟ :شكلها ما عرفتني رشا
    رشا: وشلون بتعرفك أنا ما علمتها0
    التفت وطالعت لها البنت مملوحة وكملت أمشي بشويش
    طلعت وحده من فصل وقالت البندري صباح الخير
    البندري:صباح النور (بيني وبين نفسي نفس صوت البنت اللي كانت تكلم رشا )كملت طريقي وصلت للفصل دخلت وسلمت وصبحت على الموجودات وكالعادة البعض يكتبون واجباتهم حطيت شنطتي إلا وحده من البنات نادتني التفت لها وبابتسامه0
    أنـــا: هلا0
    خلود:كتبتي واجب الحديث؟؟
    أنـــا: ايوه0
    خلود: أبي دفترك0
    رفعت شنطتي على الكرسي وطلعت دفتر الحديث وعطيتها الدفتر وقالت لها
    أنــــا: خلود لا خلصتي حطيه في الطاولة0
    خلود:طيب0
    طلعت من الفصل ورحت لفصل صديقتي (ف) فتحت الباب ولقيتها توها جايه حطت شنطتها وتتعطر0
    أنـــا: صباح الخير0
    ف:صباح النور0
    أنــا: يالله0
    ف:زين0
    طلعنا من الفصل ورحنا نتمشى أكيد بتقولون من له خلق يتمشى على هالصبح حنا طبعنا كذا نتمشى متى ما حصلنا بعضنا ما نجلس إلا إذا كنا نفطر ساندوتش وعصير0
    ظلينا نسولف عن وش صار أمس في بيتنا وبيتهم الين كل شوي تجي وحده من صديقاتنا وصفرت طبعاَ (ش)دائماَ تتأخر ويوقفونها هي والبنات المتأخرات على جنب أنا و(ن) صافات الثانيات ونطالع فيها ونضحك عليها وهي تتوعد فينا بعدين.. (ش) مع إنها تتأخر دائماَ إلا ما صادوها إلا مرتين بسبب التهريب توقف على طرف من جهة الباب اللي يمر من عنده فصلنا وإذا مرينا مشت قدامي أنا و(ن) و خبينا عليها علشان محد يصيدها وهذه العادة دائماَ
    الحـــصة الأولى
    الحصة الأولى ما أحبها أبدا وما انتبه للدرس ومع كذا أشارك المادة الله يسلمكم إنجليزي المادة ما عليها قصور لكن معلمتنا ما تضحك أبدا دائماَ مكشرة ومالها خلق للحصة هذه هي من درستني السنة اللي فاتت كنت سرحانه أطالع للباب كانوا عنده بنات يكلمون صديقتي(ش) وأنا أطالع فيهم بعدين صديت و ظليت أطالع في الكتاب و أشخبط عليه بقلمي الرصاص وامسح وهذه حالتي الين ما سمعت اسمي رفعت راسي وطالعت للمعلمة طالعت فيني قالت
    المعلمة:read the title (وأشرت عليه)
    رفعت كتابي وقريته قالت
    المعلمة:very good thank you
    نزلت كتابي على الطاولة وجلست رجعت ألعب بقلمي وأستمع للدرس0خلصت من الدرس و عطتنا واجب صفحه كاملة من الوورد ستادي وأخيرا جاء الفرج صفرت الحصة المعلمة شالت أغراضها وطلعت من اتجهت المعلمة للباب وأنا و(ن)و(ش) ركض وراها علشان نطلع فصل (ف)مقابل فصلنا هي جالسة قدام وقفنا نطالع فيها ونحّرها إنا طالعين براء وهم عندهم حصتين رياضيات ورى بعض (حرام كسروا خاطري) التفت إلا معلمة الأحياء جت وبنات فصلي جوا بيطلعون قلت
    أنــا :لأحد يطلع جت أستاذه (-----)
    البنات:يووووووه مالنا حظ0
    دخلت للفصل وشلت مادة الإنجليزي وطلعت الأحياء دخلت المعلمة
    المعلمة:يالله يا بنات على المعمل بسرعة0 (المعلمة وقفت عند الباب علشان تتأكد إن الجميع راح و محد هرب من الحصة رحنا للمعمل اخترنا مكان وجلسنا أنا و(ن)و(ش) و(أ) و(س)0(س) دمها خفيف مره وبس تسولف على (أ)
    وشاطرة بنفس الوقت على كثرة سوالفها0
    المعلمة: بس خلاص لأحد يتكلم0
    الفصل سكت علشان المعلمة تبداء الدرس0 بدت المعلمة تشرح الدرس كان درسنا عن الحمض النووي والكل منسجم فيه وعدت الحصة بسرعة لأن حصة الأحياء ممتعه بعض الشيء عطتنا الواجب وصفرت الحصة طلعنا نمشي أنا و (ش) و (ن) بشويش و نسولف قالت (ش)
    (ش):تعالي أنتي وياها اليوم تضحكون علي بالطابور يأخذ هالوجيه0
    (ن):أحسن تستأهلين ليش تتأخرين0
    أنـــا: (ش) شكلك يضحك وأنتي واقفة0 و بعدين عدلي هالكشه اللي طايره0
    (ش):مالت عليكم من صديقات الحين شعري محيوس وما تتكلمون0 (عطت كتبها (ن)علشان تعدل شعرها)
    وصلنا للفصل معلمة الحديث واقفة على الباب أحلى حصة الحديث لأن المعلمة قاطة الميانه معها و تسولف معنا في الحصة وتنكت طالعت ب(ش) وضحكت لأن (ش)أخت البنت اللي تحبها المعلمة دخلت (ش)قدامنا وبعدها أنا مريت من عند معلمة الحديث وقلت
    أنـــا بابتسامه:صباح الخير أستاذه0
    المعلمة ضحكت:صباح النور0
    دخلنا الفصل وجلسنا بدت المعلمة تفتش على الواجب أنا و(ش) جالسات بجنب بعض و(ن)جالسه بعيدة شوي عنا كنا نسولف أنا و(ش) التفت ل(ن) إلا هي وتطالع فينا سويت لها حركة تحرها انقهرت وفتحت دفترها وكتبت بورقة
    (يأخذ هالوجيه تسولفن وأنا طفشانه لحالي شكلي بجي كل حصة بالنص بينكن أبي أعرف وش تسولفن فيه ) قريتها وطالعت فيها وسويت لها حركة تحرها زيادة سوت نفسها مؤدبة استغربت التفت إلا المعلمة واقفة قدام عند البنات اللي قدامنا وشافت وش سويت ل(ن) وضحكت طالعت فيها وضحكت خلصت المعلمة من التفتيش على الواجب وبدت الدرس الحديث كان قصير مره خلصت بدري وقالت
    المعلمة:تبون تروحون للكافتيريا؟؟
    البنات:ايوه أستاذه0
    المعلمة:يالله روحوا بس لأحد يطلع من الكافتيريا علشان ما تزعجون الفصول الثانية 0
    البنات طلعن و راحن للكافتيريا حنا أول من طلع علشان نشتري ونهرب من الممر الثاني المعلمة راحت لغرفة المعلمات صفرت الجرس وطلعوا البنات واجتمعنا وافطرنا خلصنا وقمنا نتمشى مرت رشا من عندي ونادتني قلت لصديقاتي لا يروحون بعيد
    رشا:السلام
    أنـــا:وعليكم السلام
    رشا:كلمتها أمس وقلت لها
    أنـــا:-------------
    رشا:هي موافقة تكون صديقتك مو معجبة هي ودها تمشي معك بعد بكرة0 تجين معي أوريكِ شكلها0
    أنـــا: أعرف شكلها شفتها الصباح اليوم معك.. أوكيه بعد بكرة تمشي معي0
    رشا: طيب أقولها يالله أخليكِ تروحين مع صديقاتك0
    رحت مع صديقاتي وهي راحت مع صديقاتها قالت (ش2) لأن عندنا ثنتين يبدون بحرف (ش)
    ش2:شكل رشا هي المعجبة مو البندري كل يوم تكلمك0
    ضحكنا وكملنا سوالفنا000
    مر اليوم وطلعنا للبيت نفس الإحداث كل يوم تتكرر بالبيت مافيه شيء جديد0

    اليوم اللي تمشي فيه البندري معي
    شفتها الصباح وأنا مارة كالعادة في الممر مع رشا كانت مسوية تسريحة غير بشعرها و متكشخة حيل قالت رشا
    رشا:صباح الخير0
    أنـــا:صباح النور0
    البندري:صباح الخير0
    أنــا:صباح النور0 راحن وكملت طريقي وصلت الفصل .......الخ0 نفس كل يوم أسوي لما أدخل الفصل0
    صفر جرس الطابور وكالعادة دائماَ مرت الحصص الأولى على خير0
    الفســـــــــــــــحة
    طلعت أنا وصديقاتي وافطرنا وجلسنا في مكاننا المعتاد عند المعمل أفطرت وخلصت وظلينا نسولف جت رشا ونادتني
    التفت لها ودريت أن البندري تبي تمشي معي الحين0
    قمت ورحت لها
    أنـــا:هلا رشا.
    رشا:البندري تبي تمشي معك الحين.
    أنـــا:وينها ما أشوفها معكِ0
    رشا:واقفة هناك تعالي معي هي مستحية من صديقاتك0
    أنـــا:أوكيه0
    رحنا لها ومشيت معها تركونا صديقاتها وراحوا ظليت أنا وهي 0
    أنا: كيفك ؟
    البندري: الحمد لله بخير أنتي كيفك؟؟
    أنا: تمام..(شوي شوي بدت تجرأ علي وتتكلم معي و تسولف)
    صفر الجرس طالعت فيني وقالت
    البندري:من عندكم الحين؟؟
    أنـــا: معلمة الكيمياء يقولون شكلها غايبة0
    ضحكت
    أنا: معجزه أول مره تغيب إذا هي غايبة على الأقل نصير حصة فاضين والله كرفونا كرف0
    ضحكت مروا صديقاتي من عندي قالت
    البندري:شكل صديقاتكِ يبونك
    أنــــا: لازم تتعرفين عليهم أنتي راح تصيرين عضو جديد عندنا.
    ابتسمت وقالت:يشرفني أني أكون صديقتكم.
    راحت معي أنا وصديقاتي ومروا من عندنا صديقاتها وأخذوها من راحت قالت (هـ)
    هـ: البنية مشاء الله حبوبة حيل.
    ن: وش قالت لكِ؟؟
    أنا: تكلمت عن نفسها وعن خواتها وصديقاتها والدراسة بس.
    ف:لا شكلها مرة طيبة وعلى نياتها.
    كانت معلمة تعرفنا تمشي ورآنا قالت
    المعلمة:يالله يا علمي على فصولكم0
    البنات سكتن أنا ما أحب أسكت لازم أرد
    أنــا: أن شاء الله أستاذه0
    رحنا لفصولنا دخلت الفصل وجلست على الكرسي حقي دخلت يدي في شنطتي وطلعت مشطي و مرايتي وجلست أعدل شعري دخلت معلمة الانتظار عندنا أخذت لها كرسي وجلست برى جن (ش)و(ن) وجلسن عندي خلصت من شعري شلت مشطي و مرايتي وطلعت العطر وتعطرت ورجعت العطر في الطاولة جلسنا نسولف عن الجوالات و الزواجات و بعدين دخلنا بمواضيع عن الحب (ن) إلى الآن ما نعرف من تحب و(ش) ما تحب أحد إما أنا بديت أتكلم عن الشخص اللي أتمنى يكون شريك حياتي وعن مواصفاته وكل شيء فيه.. مر الوقت بدون ما نحس من كثر سواليفنا..
    صفرت الحصة وراحت المعلمة اللي كانت عندنا وحنا طلعنا على طول سألت (ش)
    أنـــا: من عندنا الحين؟؟ (لأني مو حافظه ترتيب الحصص)
    ش بدون مبالاة :فيزياء..يالله نهرب.
    أنا و(ن) :يالله.. (هربنا من الممر الثاني علشان ما تمسكنا )
    وصلنا لفصل أخت (ش) كانت جالسة قدام طالعت فينا وبدينا نلهيها ونضحكها بعدين رحنا وصلنا لغرفة المعلمات قلت
    ل (ش)
    أنا: أدخلي شوفيها إذا كانت هنا قولي لها أني أبيها0
    ش: لا أستحي من أبله نوف هي موجودة هنا0
    أنا: يا ربي يا الحياء توه ينزل عليكِ.
    ش بتفاخر: أصلن أنا دايم حيوية علشان كذا المعلمات يحبوني.
    أنا: واضح الحياء مشاء الله لو يدرون عن سوالفك اللي خبري خبرك كان انهبلوا معقولة البنت اللي تستحي هاذي سوالفها..
    ش: أي سوالف؟؟
    أنـــا: علينا يا مناحي الدروس الخصوصية اللي تعطينا إياه دايم..
    ش وتوها تتذكر: إيــــــــــــــــــه توني تذكرت الله يقلع بليسك.
    ن: الحمد لله والشكر يالله خلصنا يا قماشه ومحظوظة (أكيد تعرفون خالتي قماشه ومحظوظة اللي دايم يتخانقن)
    أنـــا: طيب مين تنادين أبله (-------). (ما نبي نسوي فضايح و إحراجات)
    ش: أنا ماني رايحه.
    ن: خلاص أنا أروح بس خلصنا يالله ترانا تأخرنا حيـــل عن الحصة..
    أنـــا: أنتي الحين روحي ناديها ولا تخافين راح ندخل الحصة بدون تهزيء.
    ن: وإذا هزئتنا ؟؟
    أنـــا: عطيني كف..
    ن: مو كف واحد كفين..
    أنـــا: يالله طيب.
    ن:زيـــــــــن.
    راحت ن ونادتها وطلعت المعلمة. المعلمة ذي أنا أعزها حيـــــــــل لأنها ونِعم المعلمة..
    طلعت ن وقالت:الحين تجي. ووقفن ن وش بجنبي طالعت فيهن بنظره عصبية وقلت
    أنــــا: خير أنتي وياها قاطات و جيهكن هنا يالله روحوا ما نبي نسولف وأنتن هنا..
    ش :مالت عليكِ أنتي وياها.
    ن: هذا جزانا يالله مشينا.
    راحن وطلعت المعلمة ظلينا نسولف أنا وهي و(ن) و(ش) واقفات من بعيد و يسون حركات ويضحكن.
    خلصت سوالفنا أنا والمعلمة وراحت هي للغرفة وأنا رحت
    لـ (ن) و(ش) وقلت
    أنــــا: وش عندك أنتي وياها تضحكن.
    ن: ولاشيء. (وتضحك)
    ش: وإذا كان عندنا شيء ما راح نقولك.
    أنا: يا خبر بفلوس بكرة بلاش. يالله على الفصل ترانا تأخرنا حيــل.
    ش: صاحية أنتي الحين تقولنا وين كنتم؟
    أنـــا: أنتن أمشن وأنا أدخلكن للفصل بسلامة.
    ن: يا خوفي تتخلين عنا.
    أنـــا طلعت في بالي فكرة وقلت: راح أتخلى عنكن إذا ما قلتن لي ليش كنتن تضحك وأنا واقفة مع المعلمة.
    ش: ما راح نقولك.
    أنـــا بنظرة خبث: أجل بقول للمعلمة أستاذه هن ما كانن معي عند المعلمة.
    ن: خلينا نقولها نخلص تراها ما تدخلنا معها ونتورط.
    أنـــا: يالله قولن لي.
    ش: أمرنا لله بنقولك بس والله راح نردها لك.
    أنـــا: نصبح قمر ونشوف.
    قالن لي ليش كانن يضحكن.
    أنـــا: الحمد لله والشكر هذا اللي كان يضحكن مالت عليكن على بالي عندكن سالفة. يالله خلنا ندخل أحسن.
    طقت (ش) الباب ودخلت ودخلنا وراها
    ش: ممكن ندخل؟؟
    المعلمة: وين كنتم؟
    أنــــا: كنا عند أستاذه (-------)
    المعلمة: أدخلن ومرة ثانية أستاذنن قبل ترحن.
    حنـــا: طيب. ودخلنا.
    مع كنا متأخرات بس ما أهتمينا بالدرس. ظلينا أنا و(ش) نسولف عن طريق الكتابة على الدفتر. طبعاَ (ن) تشوفنا و منقهرة حيـــــــل وأنا أسوي حركات لها علشان أحّرها زيادة..
    مر اليوم وطلعنا لتهوية المدرسة (الحوش) ولبسنا عباياتنا وطلعنا (ن) راحت وأنا و(ش) كالعادة جالسات ننتظر باصاتنا تجي. جاء باصها وراحت و ظليت لحالي جالسة طبعاَ فيه بنات كثار ينتظرون باصاتهم جاء باصي بعد عناء طويل ركبت ووصلني وراح. دخلت البيت أمي جالسة في الصالة.
    أمي: وش فيكِ متأخرة اليوم شوي؟
    أنـــا: الباص تأخر. رميت شنطتي وعباتي على الأرض ورحت علشان أستحم و اتغدى تغديت وجلست شوي على التلفزيون وأذن العصر صليت و بديت أذاكر..
    ذاكرت وخلصت جهزت شنطتي و بديت أذاكر الاختبار اللي عندي كان الاختبار مادة التوحيد خلصته بدري وجلست على الكومبيوتر و بديت أشتغل على برنامج الفوتوشوب ما حسيت بالوقت لأني مندمجة بالصور أمي تناديني
    أنــا: هلا يمه..
    أمي: تعالي تعشي..
    أنـــا باستغراب: الحين عشاء بدري يمه.
    أمي: بلاكِ ما تدرين الساعة كم.
    ناظرت للساعة لقيت أنها الساعة 9 مساءاَ
    أنــا وضربت يدي على رأسي: يووووووه ما صليت.
    أمي: يالله تعالي.
    أنـــا: زين يمه.
    قمت و توضيت وصليت ونزلت وتعشيت مع أمي وأبوي وأخواني.
    غسلت مريولي بنفسي لأن ما عندنا خادمة أمي تكره الخادمات وما تحب أحد يشتغل بدالها إلا حنا يا بناتها..
    غسلته وعلقته وجلست معاهم على التلفزيون..
    والنصف10مـــســـاءاَ
    أبوي نام وأمي جالست معي شوي و بعدين نامت ظليت لحالي في الصالة جلست أقلب في القنوات مافيه شيء عجبني حطيته على mbc4 وجلست أتابع فلم. انتهى الفلم الساعة تقريباَ 12 وشوي. طفيت التلفزيون ونمت..

    الثلاثاء الساعة 4والنصف فجراَ
    جوالي يدق المنبه طفيته ورجعت نمت شوي و بعدين دخل أبوي و صحاني قمت و توضيت وصليت و لبست مريولي و بديت أزين شعري خلصت ولبست شرباتي ونزلت أفطرت ولبست جزماتي تكرمون ولبست عباتي وجلست على درج الحوش وطلعت كتابي و بديت أراجع اختباري وصلت للدرس الثاني إلا الباص جاء بيب بيب طلعت وركبت وصلني للمدرسة كالعادة بسرعة جنونية فتحت الباب ونزلت سكرته وراح. بديت أمشي بشويش كان فيه ولد صغير كان ولد الحارس واقف عند باب المدرسة شافني جيت حط يده على طرف وجهه يغطي وجهه علشان ما يشوفني أنا والبنات اللي وراي وقال
    الولد : بسرعة بسرعة أدخلوا ويلوح بيده بحركة بمعنى بسرعة دخلت وأنا ميتة من الضحك عليه لأن شكله كان يضحك ..
    دخلت ونفس كل يوم نزلت عباتي ولفيتها بطريقة مهملة وعدلت شعري أخذت شنطتي ومشيت لقيت صديقتي(ف) قدامي ناديتها
    ف: هلا والله.
    أنــا: صباح الخير.
    ف: صباح النور.
    ظلينا ساكتات ودخلنا المبنى مرت رشا والبندري
    رشا: صباح الخير.
    البندري: صباح الخير.
    أنـــا بابتسامه: هلا صباح النور.
    وصلنا لفصولنا
    ف: بحط شنطتي وأمر عليكِ.
    أنــا: زين.
    دخلت فصلي وسلمت وكالعادة وحده من البنات اللي تجلس
    قدامي كل يوم تصبح علي.
    فايزة: صباح الخير.
    أنـــا: صباح النور. (أكلمها وأنا أمشي حطيت شنطتي على الكرسي وعباتي في الطاولة وطلعت عطري وتعطرت )
    فايزة: وش سويتي بالتوحيد.
    أنــا: حلو سهل. وأنتي أكيد حافظة التوحيد كامل. (حبيت إحراجها لأنها تحب معلمة التوحيد)
    فايزة بضحكه: أكيـــد أحفظه زي أسمي.
    دخلت ف قالت
    ف: يالله .
    أنـــا: يالله هذا أنا جيت.
    طلعنا وتمشينا شفت المعلمة اللي كلمتها أمس ومرت من عندي طالعت فيها وهي طالعت فيني
    أنـــا: صباح الخير .
    المعلمة:صباح النور.
    المعلمة دخلت لغرفة المعلمات وحنا كملنا تمشينا صفر جرس الطابور ورحنا للكافتيريا نصف هناك في الطابور ومعلمة الرياضيات واقفة قدامنا و تسولف على المعلمة اللي بجنبها (ش) المرة ذي جت قبل لا يمسكون البنات المتأخرات و(ن) صافه قدامي الأولى مع وحده من بنات فصلنا شفت معلمة الرياضيات تسولف مع المعلمة اللي معها ضربت (ن) وقلت لها
    أنــا: هم يقولون لنا أنتم من تجون من بيوتكم تسولفون وهم ما يشوفون نفسهم يسولفون بعد..
    ن سمعت كل الكلام و ماردت لأن معلمة الرياضيات تشوفها لا تكلمت بس هزت رأسها دلالة على استماعها وفهمها للكلام اللي قلته. أما (ش) كانت ملتهيه تلعب بأطراف شعرها الطويل. و(هـ) صافه على نفس المستوى منا قلت لها
    أنـــا بلقافه: صباح الخير.
    هـ بدون نفس ومزاج معكر: صباح النور.
    أنـــا: آفا وش فيكِ اليوم مزاجك مقفل.
    هـ بتثأوب: يووه مالي خلق أتكلم. وما شبعت نوم.
    أنـــا: الحمد لله أنا ما نمت عدل بس أحس أني مروقه شوي.
    معلمة الرياضيات: يالله يا علمي أمشوا.
    رحنا للفصل و كالعادة الرادارات واقفة في جميع الجهات يشوفون المخالفات واللي حاطات مكياج. مرينا بسلام.
    ( ما أبي أتكلم عن حصة الرياضيات لأنها تلوع الكبد المادة سهلة وحلوة لكن المعلمة تقـــــــهر الله يذكرك بالخير يا معلمتنا منال أخذت أجازه لأنها بتولد كانت الحصة معها حلوووة )
    ننتقل للحصتين اللي بعدها و يجيبن المرض وراح أعديهن كمان..
    الفسحــــــــة
    كالعادة طلعنا أنا و (ن)و(ش) ومرينا البنات ورحنا للكافتيريا شرينا وطلعنا افطرن و بعدين قمنا نتمشى لفت انتباهي شيء وسألت البنات
    أنـــا: بنات اليوم ما شفت البندري و رشا إلا الصبح بالعادة كل شوي أشوفهن في الممرات!!
    هـ: يمكن بالفصل؟
    ش2: أو عند وحده من المعلمات؟
    ف: وش خسرانين خلونا نمر الفصل ونشوف.
    رحنا للفصل ودخلت هـ تشوف إذا هن موجودات طلعت وقالت
    هـ: موجودات والبندري تبكي.
    أنـــا باستغراب: تبكــــــي!!!
    هـ : إيه تبكي وجالسة عندها رشا.
    دخلت الفصل ودخلن صديقاتي وراي جيت لقيت البندري تبكي ورشا تحاول تسكتها.
    أنـــا: رشا وش فيها البندري؟؟
    رشا طالعت فيني وطالعت في البندري وظلت ساكتة
    أنـــا: البندري البندري.
    طالعت فيني وعيونها حمراء و مليانه دموع
    أنـــا: البندري أنتي أختي وصديقتي واللي يضايقك يضايقني.
    البندري:-----------
    أنـــا حطيت يدي على كتفها وقلت لها : قولي لي وش فيكِ.
    البندري بصوت مخنوق: خلي رشا تقولك.
    أنــا: رشا قولي لي.
    رشا مسكت يدي وسحبتني ومرت من عند صديقاتي وقالت
    رشا: بنات تقولكم هي بعدين.
    البنات: طيب.
    رحت مع البندري عند باب الفصل وقالت
    رشــا: البندري تبكي لأن هالأسبوع أخر أسبوع لي هنا.
    أنـــا باستغراب: أخر أسبوع؟!!
    رشا: أنا بنقل لحايل أبوي جاه نقل هناك.
    أنــــا:-----------
    رشا: البندري مالها صديقة إلا أنا.(وطالعت للبندري)
    أعرف وش اللي بعيونها بدون ما تتكلم (ورجعت طالعت فيني) هي محتاجه أحد يساعدها إذا في يوم أفتحت قلبها لك ساعديه أنا ما قدرت إلا أني أصبرها بس.
    أنـــا ما فهمت وش كانت تقصد قلت: زين.
    رجعنا للبنات لقيناهم هدوا البندري وجلسوا يسولفون عليها ويضحكونها صفر جرس الحصص ورحنا للفصولنا أنا ما كنت مركزه بالدرس كنت أفكر بكلام رشا لي.
    عدى اليوم على خير ورجعت للبيت ونفس كل يووووووم...الخ.

    أخر أيام الأسبوع في نهاية الدوام
    كنا واقفات أنا وصديقاتي مع رشا والبندري البندري كانت ساكتة ما تكلمت أبداَ والبنات اللي يعرفون رشا جوا يسلمون عليها ويودعونها
    رشا: يالله بنات أشوفكم على خير. ودي أتأخر بس أبوي ينتظرني برى لأزم نمشي الحين.
    أنـــا سلمت عليها وعطيتها هدية بسيطة وصغيره حطيتها في جيبها بدون ما تحس والبنات سلموا عليها البندري كانت أخر وحده سلمت عليها سلمت عليها ما قدرت تمسك نفسها مسكتها وضمتها وبدت تبكي رشا ما قدرت تمسك نفسها هي الثانية وبدت تبكي.
    ف: تعوذوا من الشيطان إذا ما التقيتوا بالدنيا تلتقون في الآخرة . و بعدين كل وحده منكم تعرف رقم الثانية وكلموا بعضكم كل يوم وحنا علينا الشحن.
    البنات:ههههههههههههههه.
    أنـــا: يالله خلونا نطلع الحين لا تمتلي المدرسة دموع منا وتصير بركة سباحة.
    البسن البنات عباياتهن وطلعن كلنا ورحنا مع رشا الين ما وصلناها لسيارتها و بعدين تفرقنا.
    رجعت للبيت وأنا ضايق صدري أستحميت وما تغديت لأن مالي نفس للأكل جلست على التلفزيون ورشا ما غابت عن بالي أبدا ضحكتها وصدى صوتها بأذني ووجهها اللي الابتسامة ما تفارقه قمت ورحت لغرفتي جلست أفكر فيها
    فتحت شنطتي لقيت رقمها موجود بدفتر الإحياء أخذت جوالي وخزنت رقمها باسم(وردتــــي)لأنها زي الوردة تعطي من رحيقها لمن حوله وتزرع الابتسامة على ثغورهم..

    أرسلت لها رسالة ( يحميك ربي من متاهات الأقــدار..
    يا بهجة الدنيا وغيمة سماهـــــــــا..
    بينك وبين العمر لو كنت بخـــتار..
    أرخصت لك نفس عطت ما وراها..
    يحميك رب البيت يا تاج الأشعـار..
    يا من حروفي بك تكمل حلاهـــــا..)
    أرسلتها ونمت قمت الساعة 7 مساءا ...

    قمت و توضيت وصليت العصر والمغرب و بديت أذاكر علشان أصير الخميس والجمعة فاضيه ما عندي شيء. حليت وأجباتي وجلست على التلفزيون و بعدين ساعدت أمي..
    الساعة التاسعـــــــة
    أبوي تعشى ونام وأخواني كمان. ظليت أنا وأمي جالسات على التلفزيون دق جوالي نغمة( تعال و ما بقى لي يوم بغيابك يصبرني أخاف أموت من شوقي....الخ) رفعت وطالعت إلا أختي رديت
    أنـــا: هلا والله..
    أختي: هلا فيكِ حبيبتي وش أخبارك وش أخبار أمي وأبوي وأخواني؟؟؟
    أنـــا: الحمد لله كلنا تمام أنتي وش أخبارك؟؟
    أختي: الحمد لله .هاه وش مسوية في الدراسة؟
    أنــــا: تمام ما علي أزقح فيها.
    أختي: هههههههههههههههه.
    أنـــا: وش أخبار العائلة ؟
    أختي: تمام. حبيبتي ما عندي رصيد كفاية بس حبيت أسمع صوتك وأشوف شنو أخبارك..
    أنــا: أوكيه قلبي ما أبي أطول عليكِ.
    أختي: يالله تأمرين شيء.
    أنـــا: لا ما أبي شيء تسلمين.
    أختي: مع السلامة.
    أنـــا: مع السلامة.
    سكرت من عند أختي طالعت لقيت أمي نايمة..صحيتها وقلت
    أنـــا: يمه قومي نامي فوق..
    قامت أمي وراحت فوق..جلست على التلفزيون اقلب في هالقنوات ما لقيت شيء حطيته على قنوات الأغاني..
    جلست أتسمع الأغاني مليت منها قمت و طفيت التلفزيون ونمت..يوم الخميس طلعنا وتمشينا والجمعة بديت أذاكر

    السبت الخامســة فجــراَ
    صحيت على منبه جوالي قمت بتكاسل لبست وزينت شعري وكالعادة روتين يومي..صفر جرس الطابور رحنا للطابور صفيت قدام أن و(ش) لأن (ن) متأخرة وما جت للحين جت معلمة التوحيد ووقفت قدام الفصل اللي بجنبنا وقريبة مني شميت ريحه عطرها رحت بعالم ثاني من روعة عطرها.. ما صحيت من جماله إلا على صوت (ش) تقول
    ش باستياء: يوووووه(ن) شكلها غايبة.
    أنـــا: لا ما أتوقع أنها غايبة.
    ش: الله يسمع منك.
    مشى طابور فصلنا ورحنا للفصل الحصة الأولى إنجليزي
    كنا نمشي والمعلمة ورآنا قربنا من الفصل إلا (ن) جت
    فرحنا أنها جت ودخلنا الفصل بدت الحصة وخلصت بسرعة الفصل اليوم قمة من الحيوية يشاركون..
    مرت الحصص الثلاث الأولى بسرعة صفر الجرس معلنناَ بداية الفسحة أخذنا فلوسنا وطلعنا نشتري يوم وصلنا
    (ش2) و(هـ) يجهزون الفلوس علشان يدخلن يشترون قالت (ف)
    ف: يووووووووووه نسيت فلوسي بالبيت..
    أنـــا: خلاص أخذي أشتري الحين. وعطيتها فلوس
    ف: لا والله ما أخذها أنا مو جوعانة..
    أنـــا: لا شكلك جوعانة واضح بوجهك( ظلينا نحلف الين ما أقنعناها وأخذت الفلوس)
    ف: بكرة أردها لك.
    أنـــا: مو لازم تردينها حنا ما بيننا شيء.
    ف: و الله تأخذينها إذا جبتها.
    أنـا: لا ما راح أخذها.( ورجعنا نتحالف)
    هـ: يا ربي الحين أنتن خلصنا يالله بكرة يحلها ألف حلال يالله أمشن..
    مشينا وجلسنا بمكاننا المعتاد عند المعمل وجلسنا نسولف ونضحك. كانت البندري معنا لأن مالها أحد غيرنا تستأنس معنا كانت متضايقة شوي وما تسولف توقعت علشان رشا تركتها ما سألتها صفر جرس الحصة الرابعة كان عندنا رياضيات قمنا رحنا للممر اللي قريب من فصولنا وصلنا البندري لفصلها رجعنا لفصلنا مرت الحصص بسرعة
    الحصة السابعة فيزياء
    المعلمة تشرح وحنا مو يمها أنا (ش) حاطات دفتر في الطاولة و نسولف عن طريق الدفتر (ن) طبعاَ تطالع فينا ومقهورة أن نسولف مع بعضنا صفرت الحصة شلنا أغراضنا وطلعنا كالعادة طلعنا لقينا المتوسطة طالعه قبلنا و الباص مو موجود ظلينا أنا (ش) وأختها(أ) وصديقتها(ج) جالسات بجنب بعض و نسولف الين ما جاء باصهن وراحن ظليت لحالي وبعد شوي جاء باصي رحت للبيت ونفس الروتين يصير كل يوم..

    الأحد في المدرسة وتحديداَ وقت الفسحة
    مرت علينا البندري وطلعنا معها (ن) و(ش) يكلمون بنت يعرفونها أنا والبندري رحنا لفصل ش2 وهــ لقينا عندهم معلمة الكيمياء وقفنا قريب من الباب كنت أطالع للمعلمة وهي تشرح والبندري واقفة بجنبي وماسكه يدي التفت للبندري لقيتها سرحانه..
    أنــا بلقافه: وين وصلت الحلوة؟؟
    البندري بابتسامه حزن: قريب وين تبيني أروح.
    أنـــا: يمكن رحتي لرشا.
    البندري: لا هنا ما تعديت ديرتنا. (طالعت بعيونها وفيها حزن قوي)
    أنـــا: البندري وش فيكِ كنك متضايقة؟
    البندري بتصريف: لا ما فيني شيء.
    أنـــا: أكيــــــــد.
    البندري: أكيــــد.
    أنـــا وضغطت على يدها: البندري حنا صديقاتك و خواتك إذا في قلبك شيء وتبين تقولينه أنا مستعدة أسمعك في أي وقت تبينه..
    البندري: ---------------
    أنـــا: وسرك في بير.
    البندري: البنات بيدرون؟
    أنـــا: إذا ما تبينهم يدرون خلاص ما راح يدرون عن أي شيء.
    البندري: أجل بعد شوي بكلمك بس نفطر في الأول.
    أنـــا: أوكيه.
    طلعت معلمة الكيمياء ودخلنا الفصل إلا البنات قاموا وطلعنا مع بعض وافطرنا قلت للبندري
    أنـــا: يالله البندري.
    البندري: يالله.
    طبعاَ بكل لقافه (ش): وين بتروحون ؟
    أنـــا: شوي ونرجع.
    ش: بروح معكم.
    أنـــا غمزت ل(ش) وهي فهمتها وسكتت . رحنا أنا والبندري وجلسنا بمكان ما فيه بنات كثار جلسنا وقلت
    أنـــا: يالله قولي لي شنو مضايقكِ؟
    البندري: بقولك بس ما أبي الكلام يطلع لأحد هذا الشيء ما يعرف فيه غيرك ورشا بس.
    أنـــا: وعد أنه ما يطلع.
    بدت تتكلم وأنا أتلقى الصدمات القوية قلت بيني وبين نفسي معقولة في أم كذا..
    قصتها أمها متزوجة أبوها وهي ما تبيه جابت بناتها وعيالها وتكرهم ما تحبه وتدعي عليهم دايم وتضربهم وإذا زعلت تحط كل زعلها على شخص واحد (البندري) البندري ما ترد عليها لأنها أمها إذا شافتها مطولة في النوم بدت تصرخ عليها وتقوله : أنتي ما منك فائدة أبداَ بس نايمة. وتصرخ عليها دايم قالت لي شيء هز قلبي من أعماقه
    البندري: تخيلي مافيه يوم يعدي وأنا ما كملت الضحكة بعد الوناسة تقوم مشاكل مالها أول ولا تالي وأمي تزعل على أبسط الأشياء اللي مالها داعي بمعنى صفاتها وطباعيها أنها تكرهنا وكل همها في الدنيا الفلوس بس لو قالوا لها بيعي عيالك يمكن تبيعهم ( البندري كانت بتبكي بس حبست دموعها علشان فيه بنات تعرفهم يمرون من عندنا)
    ظلينا نتكلم وحاولت أصبرها وتعطيني وقت أني أفكر علشان أعطيها حل للمشكلة اللي هي عايشه بدوامتها الغير منتهية. فكرت وفكرت للآن بحل لكن ما لقيت لها حل هي كل يوم تزداد المشاكل في بيتهم ما قدرت غير أني أصبرها الين يجي نصيبها وتتزوج وتعيش حياتها بعيد عن المشاكل..
    لكن صرختها ما تزال في ذاكرتي بكلماتها( ساعديني بموت وأنا ما تطلعت من هالبيت بموت بسبب هالمشاكل والضغوط النفسية لدرجة أني إذا عصبت أو تضايقت أكل من الحلويات وما أحس بنفسي بموت بسبب وزني)
    تذكرت كلام رشا لي يوم قالت (إذا فتحت لك قلبها ساعديها) توني أستوعب كلام رشا لي و شنو مقصدها..
    أنا ساعدتها قدر الأمكان هي الحين تطلب مساعدته من حوله من الناس مدوا لها المساعدة قدر المستطاع...
    ملاحظة: ( البعض قد يرى مشكلتها عادية لكن مشكلتها أعمق ولكن توجد أشياء كثيرة لا يمكن قولها لكم عن والدتها)


    010 010 010
    avatar
    المختــار

    وكيل  وكيل


    ذكر
    عدد الرسائل : 888
    العمر : 37
    الدولة :
    نقاط : 3505
    تقييم الأعضاء : 4
    تاريخ التسجيل : 24/10/2010
    الأوسمة :
    وسام مسابقة الضيف المجهول :

    رد: قصتي قــصة (قصة واقعية )

    مُساهمة من طرف المختــار في الأحد فبراير 06, 2011 10:30 am

    يعطيك العافية على نقلك القصة

    دمت بالف خير
    avatar
    Naheel

    رقيب  رقيب


    انثى
    عدد الرسائل : 494
    العمر : 22
    العمل/الترفيه : طالبة
    المزاج : تمام
    الدولة :
    نقاط : 3102
    تقييم الأعضاء : 3
    تاريخ التسجيل : 05/10/2010
    الأوسمة :
    وسام مسابقة الضيف المجهول :

    رد: قصتي قــصة (قصة واقعية )

    مُساهمة من طرف Naheel في الخميس فبراير 10, 2011 9:40 am

    يعطيك العافيه رفيق عمرو
    عالقصه الحلوه والمؤثره....

    تحياااااااتى

      الوقت/التاريخ الآن هو الأربعاء نوفمبر 22, 2017 6:39 pm