ترويض الكلب - قصه قصيره

كلاب الشارع- واللى انا عارفهم بالاسم- كانت النهارده زايده كلب جديد .. انا حاولت
اتعرف عليه لكنه كان شرانى جدا كانه ما شافش بنى ادمين قبل كده .. كل ما احاول امد
ايدى ناحيته يزوم ويحاول يعضنى ...


***


صحيت النهارده على اخبار فتح النار على المصلين فى المسجد الاقصى .. انا غسلت وشى بسرعه
ووقفت فى البلكونه مستنى بتاعة الجرايد لما تعدى علشان اشترى جرنان .. كانت كل
كلاب الشارع -واللى انا عارفهم بالاسم- قاعده تلعب مع بعض ، لكن الكلب الجديد كان
واقف لوحده فى نهاية الشارع وقاعد يهوهو على كل واحد فايت وبيحاول يعضه .. الناس
واللى متعوده على كلاب الشارع – واللى انا عارفهم بالاسم - ده كانت مندهشه احنا
ليه سيبينه مدام شرانى كده !!؟


**


بالليل وقبل ما انام ... اطمنت من اخر نشرات الاخبار ان المساعى السلميه بتجرى علشان يعم
الهدوء المنطقه من جديد بعد المذبحه ونمت وانا بحلم بالهدوء مخيم على بيتنا ، لكن الساعة
3 بعد نص الليل انا صحيت مفزوع .. كان الكلب الجديد واقف تحت البلكونه بتاعتى وقاعد
يهوهو .. قمت بصيت .. كل شئ طبيعى ..


"بيهوهو على ايه ابن المجنونه ده" .. حدفته بطوبه
جرى واستخبى جنب البيت لكن فضل يهوهو ، دخلت وقفلت البلكونه وحاولت انام لكن صوت
نباحه كان واصل لودانى وقلقنى....


فين ع الصبح ساب بلكونتى وراح يهوهو فى حته تانيه .. ماكنش ممكن انام لان معاد الشغل
جه لكن انا قررت بعد اللى حصل طول الليل انى اروض الكلب ده علشان على الاقل يبقى
ذى اى كلب من كلاب الشارع –واللى انا عارفهم بالاسم - ..


**


الجزار اللى فاتح فى شارعنا واللى طول عمر علاقتى بيه محصوره فى " صباح الخير "
.... "صباح النور " .. بس .. استعجب جدا لما لقانى داخل عليه الدكان
وبصبح وحلف طلاق ثلاثة لازم اشرب حاجه ، لكن لما سمع طلبى لفه من غير كلام وسابنى
مشيت ..


بالليل انا ربطت العظمه بحبل ونزلتها م البلكونه .. شافها جرى عليها .. رفعتها قدامه لكن
ماكنش ممكن يطولها .. قعد يشب وينط بيحاول يمسكها وفى كل مره يفشل يزيد سعاره وجنانه
فيشب اكثر وينط اكثر ... لما اطمنت للموقف دخلت وقفلت البلكونه ونمت ..


الصبح اول ما صحيت م النوم .. كانت نشرة الاخبار بتأكد ان الوضع مشتعل فى القدس وقطاع
غزه والضفه الغربيه .. فتحت البلكونه .. كان نايم بيبص للعظمه .. سحبت الحبل ودخلت
غسلت وشى ورحت الشغل


**


واحد صاحبى قاللى .." ان حكاية العظم دى ما تنفعش وان انت كل ما هتديله عظمه او تحسسه
انه ممكن ياخدها هيطمع فى غيرها وان ماقدرش فى الاخر ياخد منك عظم هياكلك انت .. فكر
كويس الحل انك تعمل على انك تمشيه م الشارع ... او ... تقتله ..... "


وانا راجع م الشغل كان قاعد ما بيهوهوش لكن بص لى وسابنى عديت


بالليل انا نزلت العظمه زى امبارح بالظبط وسبته ودخلت نمت ...


**


الصبح رفعت العظمه ... كان واقف جنب الحيط وباصص لى .. غسلت وشى ورحت الشغل ... صاحبى
قاللى .." اللى بتعمله ده خطر جدا ... اكيد الكلب ده فى الاخر هياكلك ..لازم
تبعده عن شارعكم والا ...."


وانا راجع م الشغل مشى ورايا .. مديت ..وهو الاخر .. جريت .. جرى ... كان على وشك انه يحصلنى
لما وصلت لباب الشقه .. دخلت وقفلت ورايا .. فضل واقف ع الباب .. قلت شويه ويزهق
فيمشى وبدأت امارس روتين حياتى العادى ..


كلت وشربت وسمعت نشرة الاخبار اللى اكدت ان الجيش الاسرائيلى فرض طوق امنى حول مناطق
الحكم الذاتى .. انا بصيت ع الكلب ، كان لسه قاعد على باب الشقه .. " يا ترى
بيفكر فى ايه ؟"...جبت العظمه م البلكونه ورمتها قدامه فى الشارع .. جرى جاب العظمه
وقعد بيها على باب الشقه ...


بالليل وقبل ما انام ... قفلت الباب بالترباس وسمعت الراديو .. كان الحصار لسه مفروض .. طفيت
النور ونمت ...بالليل والاوضه بتشغى ضلمه .. انا حسيت بحركه فى باب الشقه .. قمت
بالراحه ابص .. كان فاتح باب الشقه وجى على اوضة النوم ... " اعمل ايه
..؟" ... جريت دخلت البلكونه وقفلت علىّ .. دخل الاوضه ... بيشمشم .. بيزق
دلفة الشيش ... انا مالقتش قدامى الا الحبل اللى كنت رابط فيه العظمه ... انا لفيت
الحبل حوالين وسطى ونطيت م البلكونه .. متعلق انا فى النص بالضبط ....
"الحـ قـ و نــ ى..............."